ஒரு வெளிநாட்டுத் தந்தை....

கனவுகள் காண்கிறேன் நிதமும்
கண்ணே உன்னைக் கண்டிடும்
திருநாள் நோக்கியே!

தேசங்களின் தூரங்களின் மீது
இதுவரை இல்லாத கோபம்
வந்ததென்ன இப்போது உன்னாலே!

இன்னும் வெளிவராத உன்
மென் பாதங்களை - தாயின்
வயிற்றினூடே தொட்டுப் பார்த்திட

கணினியின் வழியே நுழைந்து
நீளாத என் கைகளின் மீது
நீங்காத கோபம் எனக்கு

சின்னதாய் நீ உதைத்திட
சிணுங்கிடும் உன்தாய் கண்டு
சிலிர்த்திட ஆசை நிறைய

என்ன சொல்வேன் கண்ணே
பணத்தினின் பின்னால் ஓடி
இழந்திட்ட விடயங்கள் ஏராளம்

பொறுத்திடு கண்ணே கொஞ்சம்
மண்ணில் நீ வரும் கணம்
வந்திடுவேன் நானும் பறந்தே

அள்ளி எடுத்து அணைத்திடவும்
உச்சி முகர்ந்து களித்திடவும்
ஆராரோ கீதம் பாடிடவும்....

தந்தையின் நிலைதனை அறிந்தே
அதுவரை கொஞ்சம் பொறுத்திரு
அன்னையுடன் சேர்ந்து களித்திரு.


 ---பிரியா